Concello da Coruña

Documentación necesaria para alta ou cambio de domicilio no Padrón municipal

Documentación acreditativa da identidade:

Documento que acredite a identidade da persoa (DNI, NIE, pasaporte...); deberá presentarse o documento orixinal en vigor.

Documentación acreditativa do domicilio de residencia:

Título que lexitime a ocupación da vivenda ou documento análogo. Este título pode ser:

-Título de propiedade: escritura de compravenda, nota simple do Rexistro da Propiedade recente, último recibo do IBIU etc.

-Contrato vixente de arrendamento de vivenda para uso como residencia habitual, con duración superior a 6 meses, acompañado do último recibo de alugueiro.

-Última factura de subministración, auga, gas ou electricidade ou fibra de datos, na que o solicitante ou o autorizante sexa titular da subministración e sempre que na factura aparezan diferenciadas os enderezos de notificación e subministración, en caso de nova alta será válido tamén o contrato de subministración.

No caso especial de estar a solicitar o empadroamento nun domicilio no que xa constan empadroadas outras persoas, o solicitante requirirá a autorización dunha persoa maior de idade que figure empadroada nese domicilio, a cal deberá dispoñer dalgún título ao seu nome acreditativo da posesión efectiva da vivenda (propiedade, alugueiro...). Será preciso achegar o seu documento de identidade orixinal.

Se o solicitante non posúe documentación, ao seu nome, acreditativa da propiedade ou alugueiro da vivenda na que se queren empadroar, requirirá autorización do titular da mesma, así como a achega do seu documento de identidade orixinal.

Consulte nas nosas oficinas a forma de autorizar o empadroamento.

Documentación acreditativa do parentesco/representación. En caso de menores de idade:

Menor que se empadroa con ambos os proxenitores:

Certificado de nacemento ou Libro de familia, orixinal.

Menor que se empadroa cun só dos proxenitores:

Cando hai resolución xudicial (garda e custodia) e ambos comparten patria potestade:

Certificado de nacemento ou Libro de familia, orixinal. Resolución xudicial que se pronuncie sobre a garda e custodia do menor ou da menor, orixinal. Autorización do outro proxenitor ou autorización xudicial, en virtude do art. 154 do Código Civil, para o cambio de domicilio ou residencia. Excepcionalmente, en determinados supostos, declaración responsable xustificando a imposibilidade de dispoñer da sinatura do outro proxenitor, modelo que lle será facilitado nas oficinas de padrón.

Cando a garda e custodia é compartida:

Se a sentenza non se pronuncia sobre o lugar de empadroamento, requirirase autorización de ambos os proxenitores ou unha resolución xudicial que se pronuncie expresamente sobre o empadroamento.

Se non existe resolución xudicial (garda e custodia):

Certificado de nacemento ou Libro de familia, orixinal.

Autorización do outro proxenitor ou autorización xudicial.

Excepcionalmente, en determinados supostos, declaración responsable xustificando a imposibilidade de dispoñer da sinatura do outro proxenitor.

Menor que se empadroa con persoas diferentes aos seus proxenitores: autorización de ambos os proxenitores ou dun deles segundo proceda. En caso de tutela ou acollemento, resolución xudicial ou administrativa, onde se estableza.

Consulte nas nosas oficinas a forma de autorizar o empadroamento.

En caso de rectificación ou modificación de datos persoais, documento acreditativo do dato correcto.