Son requisitos esixibles ás entidades beneficiarias, que deberán estar cumpridos con anterioridade á data da proposta provisional de concesión da subvención, os seguintes:

a) Que carezan de fins lucrativos e que, de acordo cos seus estatutos, teñan obxectivos e finalidades coincidentes co obxecto da subvención. O cumprimento deste requisito esixirá en todo caso estar constituído de conformidade coa normativa vixente e debidamente inscritos no correspondente rexistro administrativo.

b) Que a actividade ou proxecto para a que se solicite a subvención sexa coincidente con algunha das finalidades recollidas na Base 3 da presente convocatoria.

c) Que se atopen ao corrente no cumprimento das obrigas tributarias coa Axencia Tributaria estatal, o Concello e a Seguridade Social. Na solicitude de subvención a persoa interesada poderá autorizar o Concello para consultar o cumprimento deste apartado. De conformidade co artigo 28.2 da Lei 39/2015, do 1 de outubro, do procedemento administrativo común das administracións públicas, o Concello da Coruña, e sempre que tecnicamente sexa posible, solicitará as certificacións que deban emitir a Axencia Estatal de Administración Tributaria, a Tesourería Xeral da Seguridade Social e o propio Concello da Coruña, para verificar o cumprimento deste apartado. Con todo, a persoa solicitante ou o seu representante poderán opoñerse expresamente á consulta ou obtención da documentación sinalada, e deberán, neste caso, presentar a documentación acreditativa nos termos previstos regulamentariamente, e achegar as certificacións acreditativas oportunas.

d) Se a actividade para a que se solicita a subvención ten como suxeitos a menores de idade, deberá presentarse unha declaración responsable de que todo o persoal (incluído o voluntario) encargado de realizar tales actividades que impliquen contacto habitual con menores cumpre co requisito previsto no artigo 13.5 da Lei orgánica 1/1996, do 15 de xaneiro, de protección xurídica do menor (segundo a redacción dada polo núm. 5 do artigo 13 introducido polo apartado oito do artigo primeiro da Lei 26/2015, do 28 de xullo, de modificación do sistema de protección á infancia e á adolescencia (BOE do 29 de xullo), e no artigo 8.4 da Lei 45/2015, do 14 de outubro, de voluntariado. A declaración responsable requirida estará incluída no propio formulario de solicitude que será asinado polo/a presidente/a e o/a secretario/a da entidade.

e) Os demais contemplados na Ordenanza de bases reguladoras xerais do procedemento de concesión de subvencións do Concello da Coruña e na Lei xeral de subvencións.