Documentación obrigatoria, en todas as solicitudes

• Modelo normalizado de solicitude dispoñible nesta sede electrónica (modelo 124) que cómpre cubrir obrigatoriamente.
• Libro de familia, só se o/a solicitante é menor de idade. Deben achegarse as follas de todos os irmáns ou irmás, incluída a persoa solicitante.

Consideraranse persoas membros computables da unidade de convivencia as seguintes:

1. A/o cónxuxe ou parella de feito.
2. As fillas e fillos menores de 18 anos, ou maiores desa idade incapacitados/as xudicialmente conforme á lexislación anterior á Lei 8/2021, do 2 de xuño, pola que se reforma a lexislación civil e procesual para o apoio ás persoas con discapacidade no exercicio da súa capacidade xurídica, ou respecto dos que se estableceron xudicialmente medidas de apoio atribuídas ás súas persoas proxenitoras despois da entrada en vigor desta lei, que convivan no domicilio.
3. As persoas menores en situación de acollemento permanente ou preadoptivo.

En caso de persoas solicitantes menores de idade, a unidade de convivencia a considerar será a formada polas súas persoas proxenitoras ou titoras e as restantes fillas e fillos menores de 18 anos, ou maiores desa idade incapacitados/as xudicialmente, que convivan no domicilio.

Na solicitude, a persoa solicitante deberá autorizar expresamente o Concello da Coruña para realizar as comprobacións dos feitos ou situacións cuxa acreditación consta na documentación que se indica a continuación.

Doutra banda, o resto de persoas membros da súa unidade de convivencia deberán autorizar expresamente o Concello da Coruña para realizar as comprobacións dos feitos ou situacións cuxa acreditación consta na documentación que se indica a continuación mediante a cobertura do Anexo I Consentimento para a consulta de datos.

Documentación que se debe presentar só en caso de NON autorizarse expresamente a consulta no formulario de solicitude (modelo normalizado 124):

Persoa solicitante:

• Documento nacional de identidade, pasaporte ou tarxeta de identificación de estranxeiro, ou outro documento que acredite a súa identificación. .
• Resolución ou certificado de discapacidade recoñecida polo organismo competente da Xunta de Galicia ou Administración competente no que conste que esta afecta gravemente á mobilidade e impide o emprego do transporte público colectivo.
• Certificado da Dirección Xeral de Tráfico de non titularidade de vehículos de tracción mecánica (persoas solicitantes maiores de idade).
• Certificado de empadroamento das persoas membros da unidade de convivencia.

Todas as persoas membros da unidade de convivencia (incluída a solicitante):

• Titularidade de prestacións económicas do Instituto Nacional da Seguridade Social (INSS) e/ou Servizo Público de Emprego (SEPE-INEM).
• Información tributaria da Axencia Estatal de Administración Tributaria (AEAT), correspondente ao Imposto sobre a Renda das Persoas Físicas do exercicio 2024.