Eira da Xoana é un proxecto, hoxe en forma de Fundación, que nace de ADEGA (Asociación para a Defensa Ecolóxica de Galiza) para levar á práctica, nunha pequena instalación en pleno centro de Galiza, o que viña defendendo desde a súa constitución.

En 2007, a partir dunhas ruínas e coa axuda da Administración, levanta unha pequena vivenda rural que serve de base para actividades durante todo o ano, sempre co obxectivo de defensa do medio ambiente  e da cultura galega .

Algúns eventos periódicos : celebración de solsticios, entroido ou defuntos, elaboración de sidra, día anual da Memoria democrática, actividade mensual de canto, baile e pandeireta; outros responden a necesidades puntuais: charlas formativas, rutas, eliminación de plantas invasoras, plantación de especies autóctonas...

Para falarnos da Fundación Eira vén o seu presidente, Xosé Salvadores Cobas , enxeñeiro técnico agrícola, profesor de debuxo, presidente de Lumieira nos anos 80, e participante no movemento ecoloxista galego a través de Adega. En 2025 publicou o caderno A fraga dos teixos.